ᎢᎦᎵᎢ, ᎢᏯ

ᎬᏅᎢ ᎢᏯ

ᎠᎦᏗᏓ ᎠᎾᎵᏍᏕᎵᏗᏍᎨᎢ ᎢᏯ ᎠᏂᏣᎳᎩ. Ꮟ ᏯᏂᎷᎬᎾ ᏥᎨᏎᎢ ᏍᎪᏂᏯ ᏓᏳᏂᎶᏒ, ᏤᏆ ᏦᎨᏏ ᎠᏛᏍᎨᎢ ᎢᏯ. ᎤᏒᏙᏂ ᏍᎬᏓᎨ ᎦᏄᎸ ᎢᏤᎯ ᎤᎵᏏᏫᏓ ᎤᏓᏥᏍᎬ ᎠᏛᏍᎪᎢ. ᎡᏘᏴ ᏥᎨᏎ ᏰᎵ ᎢᏯᎦᏴᎵ ᎢᏳᏥᎶᏓ ᎠᏛᏍᎨᎢ ᏧᎦᏃᏮ ᏗᎧᎸᎬᏗᏣ ᏕᎨᏴ ᎾᎥᏂ ᏃᎴ ᎤᏩᏂᎨᏍᏛᎯ.

ᎢᏯ ᏧᏓᎴᏅᏓ ᎬᏔᏂᏓᏍᏗ

ᎤᏟᏂᎩᏓ ᎢᏯ, ᏃᎴ ᎨᏍᏗ ᎦᏓᏁᎯ ᎢᎦᎵᏍᏗᏍᎩ ᏱᎩ. ᏧᏙᏓᏋᏓ ᎭᏅᏗᏍᎨᎢ ᎠᏂᏣᎳᎩ.ᏔᎷᏣ ᏗᎬᏅ ᏧᏓᎴᏅᏓ ᎠᏂᎶᏗᏍᎨᎢ ᏃᎴ ᏰᎵᏉ ᎠᎹ ᏗᏥᏍᏙᏗ ᎨᏎᎢ. ᎠᏦᏴ ᏃᎴ ᎡᏓᏍᏗ ᏗᏰᏍᏛᏗ ᏂᏓᏅᏁᎭ ᎠᏂᏣᎳᎩ. ᏧᏐᏛᎾ ᏗᏍᎬᏓᎨ, ᎦᏅᏃᏩ, ᏗᎫᏇᏍᏗ ᏃᎴ ᏗᏦᏔᏍᏗ ᏓᏃᏒᏍᎨ. ᎡᏘᏴ, ᎠᏂᏣᎳᎩ ᎢᏯ ᎬᏗ ᎠᏰᎳᏍᏗ, ᏗᎦᏝᏗ ᏃᎴ ᏗᎦᏘᏍᏙᏗ ᏂᏓᏅᏁᎮᎢ.ᏃᏉ, ᏍᏔᏱ ᎠᏩᏛᏗ ᎣᎯᏍᏙᏗ ᎢᏯ.

ᎠᏂᏲᏍᏗᏍᎬ ᎢᏯ

ᏍᎪᏂᏯ ᏓᏳᏂᎶᏒ ᏴᏫ ᎨᏍᏗ ᏯᏃᎵᎨᎢ ᏄᎵᏍᎨᏗᏴ ᎢᏯ.ᏍᎪᏂᏯ ᏓᏳᏂᎶᏒ ᎤᏂᎧᎵᏲᏁᎢ ᎢᏯ ᏕᎨᏴᎢ ᎾᎥᏂ ᎤᏂᏫᏒᏗ ᏃᎴ ᎤᎾᏛᎯᏍᏙᏗ ᎦᏄᎸ ᏩᎦ ᎤᏂᎩᏍᏗ. ᏍᏓᏱ ᎠᏩᏛᏗ ᎢᏯ ᎤᏰᎬ.

ᎤᎵᏍᎨᏗᏳ ᎨᎲ ᎢᏯ ᎨᏍᏗ ᎤᏕᎳᏗ ᏱᎩ

ᎢᎾᎨ ᎠᏁᎯ ᎠᎾᎵᏍᏕᎸᏗᏍᎪ ᎢᏯ

ᎠᎦᏗᏓ ᎢᎩᏲᎰᏎ ᏳᏂᏒᏃᎾ ᎢᏯ ᎤᏰᎬ. ᎯᏍᎩᏍᎪ ᎤᎶᏒᏍᏗ ᎢᏳᎾᏓᎴᎩ ᎤᎾᎵᏍᎦᏍᏙ ᎢᏯ, ᏅᎩ ᏗᏂᏅᏌᏗ, ᏥᏍᏆ, ᎢᎾᏓ, ᎠᏣᏗ, ᏃᎴ ᏍᎪᏯ.ᏍᏈᏍᏓ ᏙᏱ ᎡᎾᎢ ᎤᏂᏍᏕᎵ ᎢᏯ ᏓᏅᏅᎢ. ᏧᏂᏍᏗᎢ ᏙᏱ ᎠᏁᎯ ᎠᏂᏂᎩᎶᎢ ᏃᎴ ᏓᎾᏁᏍᎩᎸᎥᏍᎦ ᎢᏯ ᎤᏓᏥᏍᎬᎢ.ᎠᏫ, ᎢᎾᎨ ᎠᏁᎯ ᎬᎾ, ᏃᎴ ᏯᎾᏌ ᎠᎾᎵᏍᏕᎵᏙᏗ ᎢᏯ. ᎢᏯ ᎤᏰᎬ ᏓᎾᏗᏍᎦᎳᏁᎮ ᎦᏚᏏ ᎠᏁᎯ ᏨᏓᏥ.ᎢᏯ ᎠᏓᏁᏝᏍᎨᎢ ᎣᏍᏓ ᎠᎵᏍᏓᏴᏗ.ᎢᏯ ᎤᏰᎬᎢ ᎠᏂᏃᎯᎵᏙᎮ ᎠᏂᏣᎳᎩ.

ᎢᏯ ᎬᏅᎦᎵᏍᎪ ᎠᎹ

ᎢᏯ ᏧᎾᏍᏕᏥ ᎠᎴᏫᏍᏗᏍᎪ ᎦᎾᎱᎩᏍᎩ. ᎢᏯ ᏚᏓᏥᏍᎬ ᎠᏍᎦᏃᎳᏗᎠ ᎠᎹ. ᎢᏯ ᎠᎴᏫᏍᏗ ᎠᎦᏗᏓ ᎦᏓ ᎤᏓᏑᏴᏗ ᎠᎹ ᎨᏴᎢ.

ᏰᎵᏉ ᎢᏗᏍᏕᎵᏗ ᎢᏯ ᎤᏛᎯᏍᏗ

ᏓᏗᏍᏕᎸ ᎤᏛᎯᏍᏗ ᎢᏯ. ᏓᏗᏍᏆᏂᎪᏔᏂ ᎠᏂᏣᎳᎩ ᎢᏳᎾᏛᏁᏗ ᎢᏗᏍᏕᎵᏍᎬ ᎢᏯ ᎤᏛᎯᏍᏗ. ᏂᎦᏓ ᎢᏓᎵᏍᏕᎵᏙᏗ ᎢᏯ ᎦᏙᎯ ᏃᎴ ᎠᎹ ᎤᏰᎸᏛ. ᎣᎯᏍᏙᏗ ᎢᏯ ᏓᎦᎾᏅᎪᏥ ᎠᏂᏣᎳᎩ ᎤᏅᏙᏗ.